جريدة أرض بلادي_فرنسا_
الشاعر والكاتب محمد لمليجي الناطق الرسمي باسم الجالية المغربية عبر العالم_
أمي الغالية
قلبت على لكلام ولقيتو قليل
باش نكتب عليك يا نبع الحنان
يا أمي الغالية راه ماليك مثيل
مانقدر نَوفي حقك فهاد الزمان
بعد غيابك القلب توجع وصبح عليل
لأنك انتي يا لميمة دواه يلا كان عيان
فضلك كثير عليّا وصبرك كان طويل
ربيتي وتعبتي وضويتي لي لمكان
شحال قاسيتي وتحملتي وحَملك كان ثقيل
وسهرتي ليالي وسنين واستحملتي لمحان
أه يا لحنينة يا لميمة وجودك شحال جميل
شحال حزنتي يا الغالية باش نكون أنا فرحان
ومرادك تشوفي ضحكتي فكل نهار وليل
غمرتيني بحبك لكبير ياهدية من الرحمان
وبعطفك ورضاك ما خليتيني نميل
أنت آية من القرأن وَوْصية نبينا العدنان
طاعتك واجبة وْيدِّيك يستاهلو التَّقبيل
الجنة تحت اقدامك وهدا سر من رب العالمين
راني مانقدر نحكي راه الدمع يسيل
حبك عظيم في قلبي كيف العاشق الولهان
يافرحة الروح مايقدر عليها القال والقيل
وبدعاويك يا لميمة نقول انا إنسان
وراني لِلَّه من الشاكرين الحامدين وربي يرحمك ويرحم جميع المسلمين
يانبض قلبي ونور نهاري الجميل وراه حبك عبادة منصوصة في ديننا لفضيل
ورضاك يا لميمة فيه سعادة يلا كان العمر طويل
