جريدة أرض بلادي ✍️:شيماء الهوصي
فهاد البلاد اللي ولات فيها نقطة ديال الما أغلى من الذهب، باقي كاينين قرارات ما مفهومةش… المغرب اللي كيعيش الجفاف عام ورا عام، واللي السدود ديالو ولات خاوية، والناس فيه كيدورو بالصهاريج يقلبو على شوية ما، كيتّخذ قرار غريب: نصيّفو الما ديالنا على شكل فاكهة الأفوكا لبلدان ما عندها حتى مشكل مع الماء، بحال كندا!
راه ماشي كلام فايسبوك ولا إشاعة، بل أرقام رسمية كتقول أن المغرب صدّر أكثر من 1180 طن من الأفوكا لكندا فموسم 2024/2025، يعني ما يعادل 1.18 مليار لتر من الما! وكل كيلو أفوكا كيشرب تقريبا 1000 لتر ديال الماء. واش هذا معقول؟
كندا، اللي عندها أنهار وبحيرات وأمطار طول العام، وصلات ليها فاكهة “الأغنياء” من عند بلاد كتقطع الماء على ساكنتها، وتطلب منهم يديرو اقتصاد حتى فالغسيل والطواليت. واش هادي فلاحة؟ ولا عبث بالثروة ديال البلاد؟
المشكلة الكبيرة هي أن هاد النوع من الفلاحة كيدعموه المسؤولين، وكيعتبروه نجاح، بينما هو في الحقيقة نزيف خطير للماء المغربي، اللي ولى فزّاعة مخيفة. كيفاش بغاو للمواطن يرضى، وهو كيتفرج فالماء ديالو كيمشي يتباع للي ما محتاجوش، وهو باقي كيشرب من السقاية؟
الناس اللي فهمت خطر هاد الشي، بحال بعض البرلمانيين، بدات كتدق ناقوس الخطر، وكتقول خاصنا نراجعو نوعية الفلاحة اللي كنشجعو، ونوقفو زراعات كتقتل لينا المستقبل البيئي، بحال الأفوكا، والدلاح، والحوامض الموجهة للتصدير.
