جريدة أرض بلادي -هيئة التحرير-
1
الگلب يتشق بالخوف
ولحزان،
كون تشوف الناس
اشحال قاسات من امحان
***
الزلزال ضرب،،
التراب شرب
دم شيوخ وصبيان،،،
وحتى اللي كان داوي
يطوي مسارب الصباح
يسگي ريح عطشان،
واللي كانت ناوية
تعجن حلم نهار جديد
احسن من اللي كان!
2
لولاد، لبنات، لخوت،،
لبيوت تموت،
الجوامع، لگصور،،،
الرياضات، الدروبة، الدواور ،،،
***
الهزة جات، الهزة مشات
النعاس يتعافر
(مع الآلام)
ما خلات التخمام، يفهم
ما خلات للنفس أمان!
3
ياه.. يا ليام
(الغدارة)
تزيدي لحزين
(مسكين)
محاين وشدة،
***
تشوكي اشواق الورد
تقطعي حبال الود
ب غدا،
تبككي لولاد
وتراب لبلاد،
تحرگي لعباد
وتگرحي الكبدة
4
مازال المحنة تدوم؟
(شوية!)
تدوم حتى تعيا..
وتعيا وتمشي
(حتى هي!).
***
تبقى ندوبها فالروح، جروح
(فيك وفيا!)
تبرا بدفا لغطا
ودوا فالجبل
ومدرسة فلوطى،،،
5
وما (ء) وضو،
وخبز طري
وطريق
بالفرح تجري!
***
وسخونة دم
وخيام
(اليوم)
وإيد تخفف
غم المضيوم
وتفاجي الهم..
تجفف دموع الگلب
تعلي راية الحب!
رحال لحسيني
10 شتنبر 2023
